அனுமன் ஜெயந்தி : நாமக்கல் மலைக்கோட்டையில், இன்று சிறப்பு அபிஷேகம்

நாமக்கல் ஆஞ்சநேயர் கோவிலில், இன்று ஞாயிற்றுக்கிழமை அனுமன் ஜெயந்தி கொண்டாடப்படுகிறது. 

இதையொட்டி, கோவில் வளாகம் முழுவதும் மலர்களால் அலங்கரிக்கப்பட்டு உள்ளன.

வடை மாலை சாத்துப்படி :

அனுமன் ஜெயந்தியை முன்னிட்டு, இன்று காலை 5 மணிக்கு ஆஞ்சநேயருக்கு 1 லட்சத்து 8 வடை மாலை சாத்தப்பட்டது.

இன்று அதிகாலை 5 மணி முதல் 10 மணி வரை சாமிக்கு வடைமாலை சாத்துப்படியைத் தொடர்ந்து,  

நல்லெண்ணெய் சிகைக்காய்த்தூள், பால், தயிர், மஞ்சள், பஞ்சாமிர்தம், திரவியம் உள்ளிட்டவைகளான அபிஷேகமும், சொர்ணாபிஷேகமும் நடைபெறுகிறது. மதியம் 1 மணியளவில் தங்கக் கவசம் சாத்தப்படுகிறது.

இணைய வழியில், பதிவு செய்த 3,000 பேர் ஒரு மணி நேரத்துக்கு 500 பேர் என அனுமதிக்கப்படுகின்றனர். 

தல வரலாற்றுத் துளிகள் :

* நாமக்கல்லில் வாயு மைந்தன் அனுமான், வானமே கூரையாகக் கொண்டு அருள்பாலிக்கிறார். 
இவரது சன்னதியில் கோபுரம், மேற்கூரை கிடையாது.

சிரஞ்சீவியான ஆஞ்சநேயர் வாயு மைந்தன் என்பதால், காற்றுபோல எங்கும் நீக்கமற நிறைந்திருக்கிறார் என்பதே இதன் தத்துவமாகும்.

* நரசிம்மர் - நாமகிரி தாயார் கோவிலுக்கு நேர் எதிரில்தான், நாமக்கல் ஆஞ்சநேயர் கோவில் உள்ளது. 

எதிரில் உள்ள நரசிம்மரைத் திறந்த விழிகளுடன் கைகூப்பி வணங்கிய நிலையில் ஆஞ்சநேயர் காட்சி தருகிறார்.

* நரசிம்மருக்கு கோபுரம் இல்லை. அவர் அமர்ந்திருக்கும் இடம் மலையைக் குடைந்து உருவாக்கப்பட்டது. 

'அவருக்குக் கோபுரம் இல்லாததால், அவரது தாசனான தனக்கும் கோபுரம் தேவையில்லை' என்று ஆஞ்சநேயர் கூறியதாக பக்தியின் மேன்மை உணர்த்தப்படுகிறது.

* நாமகிரி தாயார் கோவிலுக்குப் பின்னால் உள்ள குடைரைக் கோவில்தான் நரசிம்மர் கோவில் ஆகும். 

மலையின் மேற்குப் புறம் உள்ள மலைக்கோவிலில் இந்த நரசிம்மர் - நாமகிரி தாயார் கோவில் உள்ளது.

* நரசிம்மரின் சிலை, மலையைக் குடைந்து வடிக்கப்பட்டுள்ளது. நாமகிரி தாயாரின் கோவில், மலையைக் குடைந்து செய்யப்படாமல் தனியாக உள்ளது. இது ஒரு குடைவரைக் கோவில் ஆகும்.

* பல்லவர் காலத்தில் இந்த கோவில் கட்டப்பட்டது. மலையின் கிழக்குப் புறம் அரங்கநாதன் கோவில் உள்ளது. 

இங்கு 5 தலையுடைய பாம்பரசன் கார்கோடகன் மீது படுத்தவாறு, திருவரங்கன் பக்தர்களுக்குக் காட்சி அளிக்கிறார்.

* நாமக்கல் மலைக்கோட்டை, தற்போது தொல்பொருள் துறையின் கட்டுப்பாட்டில் உள்ளது. 

இதன்மீது ஏறுவதற்கு, மலையின் தென்மேற்குப் பகுதியில், சிறிய படிக்கட்டுள்ளது. பாறையைச் செதுக்கி இந்தப் படிகள் உருவாக்கப்பட்டு உள்ளது.
*