ஆசியாவில் மிகப்பெரிதன்றோ; ஆழித்தேராம்.. ஆரூர்த்தேர்.!
 

திருவாரூர் தேரழகு என்பது சொல்வழக்கு. இத்தேர் ஆசியாவிலேயே மிகப்பெரியது என்பது குறிப்பிடத்தக்கது. 

மிக மிகப் பிரம்மாண்டமான இத்தேர் குறித்த வரலாற்றுச்சுவடுகள் குறித்து இங்கே பார்ப்போம்.

எண்கோண வடிவில் அமைந்த இந்த ஆழித்தேர், 4 நிலைகளையும், 7 அடுக்குகளையும் கொண்டது.

தேரை இழுத்துச் செல்வதுபோல அமைந்த 4 குதிரைகள், 32 அடி நீளமும், 11 அடி அகலமும் கொண்டவை.

தேரை இழுக்க 4 வடங்கள் பொருத்தப்படும். இவை ஒவ்வொன்றும் 425 அடி நீளம் கொண்டவை. கயிற்றின் சுற்றளவு 21 அங்குலம் ஆகும். 

‘திருவாரூர் தேரழகு’ என்பது சொல் வழக்கு. ஆசியாவிலேயே மிகப்பெரிய தேர் இது.

* ‘ஆழித்தேர் வித்தகனை நான் கண்டது ஆரூரே..’ என்ற திருநாவுக்கரசரின் பதிகம் மூலம், கி.பி. 5-ம் நூற்றாண்டு காலத்திலேயே திருவாரூர் தேர் இருந்திருக்கிறது என்பது புலனாகிறது.

* திருவாரூர் தேரை ‘ஆழித்தேர்’ என்று வர்ணிப்பார்கள். கடல் போன்று பரந்து விரிந்தது என்பதால், இந்தப் பெயர் வந்தது.

* அலங்கரிக்கப்படாத தேரின் உயரம் 30 அடி. விமானம் வரையான தேர்ச்சீலை அலங்காரப் பகுதியின் உயரம் 48 அடி, விமானம் 12 அடி, தேர் கலசம் 6 அடி என முழுமையான அலங்காரத்துடன் திகழும் ஆழித்தேரின் உயரம் 96 அடி.

* தேர் அலங்காரத்திற்காக 5 டன் பனஞ்சப்பைகள், 50 டன் மூங்கில், 10 டன் சவுக்கு கம்புகள், ஒரு டன் கயிறு, ½ டன் துணிகள் மற்றும் சிறுசிறு பொம்மைகள் பயன்படுத்தப்படுகின்றன.

* அலங்கரிக்கப்படாத நிலையில் தேரின் எடை 220 டன். அலங்கரிப்பட்டதும், அதனை எடை 350 டன்னை எட்டிவிடும்.

தேர் ‘தடம்’ :

பல ஆண்டுகள் ஓடாமல் இருந்த தேர் என்பதால், அதனை பழுதுபார்த்தனர். அப்போது, திருச்சி பெல் நிறுவனம், 10 சக்கரத்திற்கு பதிலாக 4 இரும்பு சக்கரமும், ஹைட்ராலிக் பிரேக் அமைப்பும் ஏற்படுத்தியது. 

* 1748-ல் ஆழித் தேரோட்டம் நடந்ததற்கான குறிப்புகள் தஞ்சாவூர் சரஸ்வதி மகால் நூலகத்தில் உள்ள ஆவணத்தில் உள்ளன.

* 1926-ல் தேரோட்டம் நடைபெற்ற வேளையில் தேர் எரிந்துபோனது. அந்த தேருக்கு 10 சக்கரங்கள் இருந்துள்ளன.

* 1928-ல் புதிய தேர் உருவாக்கும் பணி தொடங்கியது.

* 1930-ல் தேர் செய்யும் பணி நிறைவுபெற்றது.

* 1948-ல் சில காரணங்களால் பல வருடங்கள் தேரோட்டம் தடைபட்டது.

* 1970-ல் அப்போதைய தமிழக அரசின் முயற்சியால் மீண்டும் தேரோட்டம் நடந்தது.

தியாகேசா :

* பண்டைய காலங்களில், இந்த பிரம்மாண்டமான தேரை இழுப்பதற்கு 12,000 பேர் தேவைப்பட்டனர் என கல்வெட்டுகள் மூலம் அறியமுடிகிறது என்கிறார்கள். 

ஆள் பற்றாக்குறையால், மக்கள் வடம் பிடித்து இழுக்கும்போது, பின்புறத்தில் யானைகளை வைத்து முட்டித் தள்ளி, தேரை நகர்த்தியுள்ளனர். 

* தற்போது, ஆயிரக்கணக்கான பக்தர்கள் வடம் பிடிக்க, யானைக்குப் பதிலாக 4 புல்டோசர்கள் கொண்டு தேர் இழுக்கப்படுகின்றன.

* ஆரூர் எனப்படும் திருவாரூரில், தியாகராஜர் கோயிலின் நான்கு மாட வீதிகளிலும், தேரோட்டம் வரும்போது, ‘ஆரூரா... தியாகேசா...’ எனும் கோஷங்களுடன் பக்தர்கள் மெய்சிலிர்த்து தரிசிப்பார்கள். 

அப்படி, தேர் வரும் இடங்களிலெல்லாம் ஆங்காங்கே பக்தர்களுக்கு நீர்மோர், பானகம், அன்னதானம், விசிறி முதலானவை வழங்கப்படும்.

* ஆழித் தேரானது, நான்கு நிலைகளையும், பூதப்பார், சிறுஉறுதலம், பெரியஉறுதலம், நடகாசனம், விமாசனம், தேவாசனம், சிம்மாசனம் பீடம் என 7 அடுக்குகளைக் கொண்டுள்ளது.

* இந்த தேரின் நான்காவது நிலையில்தான், உத்ஸவர் தியாகராஜ சுவாமி வீற்றிருப்பார். 

இந்த பீடம் மட்டுமே 31 அடி உயரமும், 31 அடி அகலமும் கொண்டது என்றால், அந்த பீடத்தின் பிரமாண்டமே சிலிர்க்கவைக்கிறதுதானே.!

* ஆழித் தேரை அலங்கரிக்கும் பணியானது, தேரோட்டத்துக்கு ஐந்தாறு நாட்கள் முன்னதாகவே நடைபெற்றுவிடுமாம். ஏராளமான மூங்கில் கழிகள் பயன்படுத்தப்படும். 

* தேருக்கான தேர்ச்சீலைகளே சுமார் 3 ஆயிரம் மீட்டர் அளவுக்கு வாங்கப்பட்டு அலங்கரிக்கப்படும் என்கிறார்கள் ஆலய நிர்வாகத்தினர்.

* தேரில், பிரம்மா தேரோட்டி பொம்மையும், நான்கு வேதங்களை முன்னிறுத்தும் பெரிய குதிரை பொம்மைகளும் என ஏராளமான பொம்மைகள் பொருத்தப்பட்டிருக்கும்.

* தேரை அலங்கரிக்கும்போது, 500 கிலோ எடையுடைய துணிகள், 50 டன் எடை கொண்ட கயிறுகள், 5 டன் பனைமரக் கட்டைகள் பயன்படுத்தப்படுகின்றன.

* திருவாரூர் தேரின் முன்புறத்தில் 4 பெரிய வடம் பிடிக்கும்  கயிறுகள் பொருத்தப்பட்டு இருக்கின்றன. ஒரு வடம் (கயிறு) 21 அங்குலம் சுற்றளவும் 425 அடி நீளம் கொண்டதாகவும் இருக்கின்றன.

* ஆழித்தேர் ஓடுவதை காண்பதைக் காட்டிலும், தியாகராஜ கோயிலின் நான்கு வீதிகளிலும் திரும்புவதை காண்பதற்கே, அதிக கூட்டம் கூடும். 

ஏனெனில், அவ்வளவு பிரம்மாண்டமான அந்தத் தேரின் சக்கரங்களை இரும்பு பிளேட்டுகளின் மீது மசையை கொட்டி, இழுத்து திருப்புவதைப் பார்க்கவே பிரமிப்பாக இருக்கும்.