ஓபிஎஸ் தொடர்ந்த வழக்குக்கு எதிராக, இபிஎஸ் பதில் மனு : சுப்ரீம் கோர்ட்டில் இன்று விசாரணை..

opseps2

அ.தி.மு.க. அலுவலகத்தில் கடந்த ஜூலை மாதம் 11-ந் தேதி எடப்பாடி பழனிசாமி மற்றும் ஓ.பன்னீர்செல்வம் ஆதரவாளர்களுக்கிடையே மோதல் ஏற்பட்டது.

இதன் காரணமாக அ.தி.மு.க. அலுவலகம் பூட்டி சீல் வைக்கப்பட்டது. இதனை எதிர்த்து இரு தரப்பும் சென்னை உயர்நீதிமன்றத்தில் வழக்கு தொடர்ந்த நிலையில், அ.தி.மு.க. அலுவலக சாவியை எடப்பாடி பழனிசாமியிடம் ஒப்படைக்க  உயர்நீதிமன்ற நீதிபதி சதீஷ்குமார் கடந்த ஜூலை 20-ந் தேதி உத்தரவிட்டிருந்தார்.

இதை அடுத்து அ.தி.மு.க. அலுவலகத்தை தற்போது எடப்பாடி பழனிசாமி மற்றும் அவரது ஆதரவாளர்களே பயன்படுத்தி வருகிறார்கள். இதை எதிர்த்து ஓ.பன்னீர்செல்வம் தரப்பில் உச்சநீதிமன்றத்தில் மேல்முறையீடு செய்யப்பட்டது.

இந்த வழக்கு விசாரணை கடந்த மாதம் 18-ந் தேதி நடைபெற்ற போது, உயர்நீதிமன்ற தீர்ப்புக்கு தடை விதிக்க உச்சநீதிமன்றம் மறுத்து விட்டது. இது தொடர்பாக எடப்பாடி பழனிசாமி மற்றும் வருவாய் துறையினர் பதில் அளிக்க நோட்டீஸ் அனுப்பப்பட்டது.

இந்த வழக்கு மீதான விசாரணை 3 வார இடைவெளிக்கு பிறகு உச்சநீதிமன்றத்தில் மீண்டும் இன்று நடைபெறுகிறது.

இந்த நிலையில் இந்த வழக்கில் எடப்பாடி பழனிசாமி உச்சநீதிமன்றத்தில் பதில் மனு தாக்கல் செய்துள்ளார்.

பண விவகாரங்களில் ஓ.பன்னீர் செல்வம் கையாடல் செய்துள்ளதால், அவரிடம் அதிமுக அலுவலக சாவியை ஒப்படைக்கக் கூடாது, அவர் அதிமுகவின் அடிப்படை உறுப்பினராக இல்லாதபோது சாவியை ஒப்படைக்க உரிமை கோர முடியாது. என குறிப்பிட்டுள்ளார்.

இன்றைய விசாரணையின்போது வருவாய் துறை அதிகாரிகளும் பதில் அளிக்க உள்ளது குறிப்பிடத்தக்கது.

Share this story